литературный кружок Ыллык

Умнуллубат үтүө аат

Биһиги үөрэхпит кыһатыгар араас кэмҥэ олус талааннаах, дириҥ билиилээх, үлэлэригэр бэриниилээх, үөрэтэр-такайар оҕолоругар бэйэлэринэн холобур буолар үтүөкэннээх учууталлар үлэлээн ааспыттара. Олор истэригэр, туох да саарбаҕа суох, бу ый 16 күнүгэр төрөөбүтэ 85 сылын туолбут Николай Ильич Бережнов киирсэр.

Орто Халымаҕа күн сирин көрбүт Бережнов Н.И. туһунан дьон-сэргэ өйдөбүлэ биир: кинини тыыннааҕар көрбүт, кэпсэппит, чугастан билбит дьон бука бары: «олус кырасыабай», «олус интеллигентнэй», «олус маанытык таҥнара», «таҥас олус үчүгэйдик олорор киһитэ этэ» диэн этэллэр; «Слово об учителе» диэн 5 сыл анараа өттүгэр, Николай Ильич төрөөбүтэ 80 сылын туолбут бэлиэ күнүгэр анаммыт хомуурунньукка эмиэ итинник ахтыллар.

Айбыт-туппут үлэтинэн аатын үйэтиттэ

Сэрэдэҕэ, алтынньы 26 күнүгэр, быйыл баара-суоҕа 35 сааһыгар Орто дойдуттан суох буолбут литературнай кириитик, Арассыыйа суруйааччыларын Сойууһун чилиэнэ, телесуруналыыс, Ойуунускай аатынан Литературнай түмэл научнай үлэһитэ Николай Рыкунов «Үтүө үгэстэри тирэх оҥостон…» кинигэтин сүрэхтэниитэ дойдутугар, Бартыһааҥҥа буолан ааста. Литературнай кириитикэ курдук уустук эйгэни талбыт эдэр киһини биир бастакынан таба көрбүт, өйөөбүт улахан өҥөлөөх, буруолуу сылдьар кинигэ киирии тылын суруйбут народнай суруйааччы  С.А.Попов-Сэмэн Тумат; Ойуунускай аатынан Судаарыстыбаннай бириэмийэ лауреата, кириитик, поэт, дьоҥҥо барытыгар олус аламаҕай сыһыаннаах Н.Е.Винокуров-Урсун; «Чолбон» сурунаал сүрүн эрэдээктэрин солбуйааччы, РФ суруйааччыларын сойууһун чилиэнэ, Николай Рыкунов чугас доҕоро Гаврил Андросов, ыччат олоҕун кырдьыктаахтык уонна итэҕэтиилээхтик ойуулуур айымньылар ааптардара, «Чолбон» сурунаал эппиэттиир сэкирэтээрэ А.Е.Варламова-Айысхаана, ХИФУ доцена, Н.Рыкунов куратора М.П.Попова уонна Коляны кытта бииргэ үөрэммит магистраннар Дьокуускайтан тахсыбыттар.

Иһирэх көрсүһүү

Ааспыт нэдиэҕэ, алтынньы 29 күнүгэр И.Е.Винокуров аатынан Намнааҕы педколледжка педагогическай билим кандидата, профессор Попова Г.С.-Санаайа салалтатынан ХИФУ төрүт култуура салаатын устудьуоннара кэлэн, бэйэлэрин үөрэнэр кыһаларын туһунан сырдатан, кэрэ кэпсээннэрин тэнитэн, музыкальнай нүөмэрдэрин көрдөрөн бардылар.

Аҕа көлүөнэ билиитин үллэстэр

Алтынньы 13 күнүгэр И.Е.Винокуров аатынан Намнааҕы педколледж «Ыллык» литературнай куруһуогун дьарыгар «Отуу уота» айар түмсүү чилиэннэрэ: Дунаев А.Г., Бубякин И.А.-Чөҥөчөх, Мохначевская М.П.-Маарта-Мария – кэлэн ыалдьыттаатылар.

Эдэр суруйааччылар сүбэ мунньахтара

Кулун тутар 29 күнүгэр Дьокуускайга ХХ-с Эдэр суруйааччылар сүбэ мунньахтарыгар сырыттыбыт. Балаһыанньа быһыытынан, тэрээһиҥҥэ 40-үгэр диэри саастаахтар кыттар бырааптаахтар. Биһиги колледжпытыттан 3-с куурус устудьуона, хоһоон суруйарга оскуолаҕа үөрэнэр эрдэҕиттэн холонор, Сунтаар Сиэйэтиттэн сылдьар Герасимов Павел кытынна.

Ийэ тылын күннэрэ

Олунньу - Одун Хаан ыйа. Олунньуга тыл ис күүһүн дьайыыта биллэ күүһүрэр, ол иһин бу ыйы атыннык Хомуһун ыйа диэн эмиэ ааттыыллар. Төрүт үгэһи тутуһан, бу ыйга колледжка тылга сыһыаннаах тэрээһиннэри ыыттыбыт:

–          Олунньу 4 күнүгэр Дьокуускайтан ийэ тыл сүмэтин иҥэринэ сылдьар саха саарынын, бэйэтин идэтин таба тайанан, суон сурахтаммыт, дьоһун ааттаммыт народнай поэты, СӨ култууратын, үөрэҕириитин уонна бэчээтин туйгунун, СӨ Суруйааччыларын сойууһун бэрэссэдээтэлин, үрдүк таһымнаах Судаарыстыбаннай бириэмийэлэр лауреаттарын, 43 кинигэ ааптарын Иван Васильевич Мигалкины уонна Көбөкөнтөн төрүттээх, республикаҕа биллэр-көстөр үлэлээх «Дьырылыатта» оҕо фольклорнай куруһуогун салайааччытын, СӨ оһуохай үтүөлээх этээччитин, ыччат политикатын туйгунун Иванова Елена Константиновнаны ыҥыран, «Ыллык» литературнай куруһуок аһаҕас дьарыгар бэрт сэргэх көрсүһүүнү тэрийдибит.

RSS-материал