Эдэр суруйааччылар сүбэ мунньахтара

Кулун тутар 29 күнүгэр Дьокуускайга ХХ-с Эдэр суруйааччылар сүбэ мунньахтарыгар сырыттыбыт. Балаһыанньа быһыытынан, тэрээһиҥҥэ 40-үгэр диэри саастаахтар кыттар бырааптаахтар. Биһиги колледжпытыттан 3-с куурус устудьуона, хоһоон суруйарга оскуолаҕа үөрэнэр эрдэҕиттэн холонор, Сунтаар Сиэйэтиттэн сылдьар Герасимов Павел кытынна. Тэрээһин бүтүн өрөспүүбүлүкэни хабар буолан, 3 күҥҥэ суоттаммыт: кулун тутар 28-ҕар ыраах улуустартан кэлээччилэр регистрацияламмыттар, оннуларын-тойдорун булуммуттар. Сарсыныгар эбиэккэ диэри пленарнай мунньах 2 №-дээх Бырабыыталыстыба дьиэтигэр ыытылынна.  Мунньахха литература эйгэтигэр сыһыаннаах орто уонна аҕам саастаахтар балайда кэлбиттэр (олор истэригэр  бастакы бирисидьиэммит М.Е.Николаев!), 60-тан тахса ыччат регистрацияламмыт. Кинилэргэ хас биирдиилэригэр тос курдук ыйааһыннаах паапкалары туттартаатылар. Мунньаҕы 17 сыл тохтуу сылдьыбыт Эдэр суруйааччылар сүбэ-мунньахтарын сөргүппүт улахан үтүөлээх, Саха сирин Суруйааччыларын сойууһун бэрэссэдээтэлэ, народнай поэт Н.И.Харлампьева аста, дакылааттаата. Кини кэнниттэн Арассыыйа Суруйааччыларын сойууһун хос бэрэссэдээтэлэ, народнай суруйааччыбыт Н.А.Лугинов, Суруйааччылар Ассоциацияларын салайааччыта О.Г.Сидоров, бастакы Бирисидьиэммит, ытыктабыллаах М.Е.Николаев, СӨ Суруйааччыларын сойууһун бэрэссэдээтэлэ, народнай поэппыт И.В.Мигалкин, Арассыыйа суруйааччыларын Сойууһун чилиэнэ, тыл билимин хандьыдаата О.И.Пашкевич,  Арассыыйа суруйааччыларын Сойууһун чилиэнэ, «Чолбон» сурунаал солбуйааччы эрэдээктэрэ Г.Г.Андросов уо.д.а. эттилэр. Кинилэр литература суолтатын, ааҕыыны көҕүлээһин, ыччаты сайыннарыы курдук боппуруостары таарыйдылар. О.И.Пашкевич «докторскай үлэни суруйарга 300 кинигэни ааҕар ирдэнэр, оттон суруйааччы буолууга 3000 кинигэни ааҕыахтааххын» диэбитэ сонуннук иһилиннэ. Эбиэт кэнниттэн 5 сиринэн секцияларынан хайдыһан, сүбэ-мунньахха кыттааччылар айымньыларын ырытыы буолла:  сахалыы хоһооннору көрүү - икки секция, сахалыы проза, нууччалыы тылынан суруллубут айымньылар уонна аҕыйах ахсааннаах хотугу норуоттар секциялара. Элбэх кыттааччылаах секциялар үлэлэрэ икки күнү хабаллар: кулун тутар 30 күнүгэр эбиэккэ диэри ыытыллаллар эбит. Айымньылары эрдэттэн хомуйбут буоланнар, ким ханна барара ыйыллан турара. Биһиги уолбут 2№-дээх сахалыы хоһооннору ырытар секцията Национальнай художественнай түмэл саалатыгар буолла. Онно 5 киһиттэн турар эксперт (Н.Е.Винокуров-Урсун - салайааччы, чилиэннэр: Старостин А.Г.-Сиэн Кынат, Александра Попова, Елизавета Мигалкина, Гаврил Андросов) лоп курдук 10 киһи хоһооннорун дьүүллээтэ. Урсун билиитэ-көрүүтэ киэҥэ, дьүүллүүр сүбэҕэ улахан уопуттааҕа, сүбэтэ-соргута элбэҕэ, сыыһалары, итэҕэстэри-быһаҕастары ыйыыта оруннааҕа киһини астыннарар. Хоһооннорун ырыттара кэлбит ыччаттар кириитикэни, үлэлэригэр сыанабылы араастаан ылыналлара харахха быраҕыллар. АГИИК 3 куурсун устудьуона Малик Тойтонов хоһоонноругар сыана быһарга дьүүллүүр сүбэ улаханнык ыарырҕатта. Сиэн Кынат сытыытык кириитикэлээтэ; Урсун ылымматын, өйдөөбөтүн аһаҕастык эттэ, Е.Мигалкина «туга эрэ тиийбэт» диэнинэн муҥурданна, Е.Андросов «дьүһүйүү суох» диэтэ. Оттон М.Тойтонов хайаларын да этиитин ылыммата. Герасимов П. хоһоонноро, төһө да ырыа айыллыбыт буоллаллар, өссө да сатархайдара ыйылынна, Павелга элбэхтик кинигэни ааҕарыгар сүбэлээтилэр. Секция үлэтин түмүктүүр тылга бу күн улахан арыйыы оҥоһуллубатаҕа аһаҕастык этилиннэ, ол эрээри, дьаныардаахтык үлэлэннэҕинэ, син добуччу үчүгэй хоһооннор тахсар кыахтаахтара ыйылынна. Бу күн 18:00 доҕордоһуу биэчэрэ былааннаммыт этэ. Үһүс күҥҥэ эбиэккэ диэри секцияларынан үлэлэр салгыы бараллар, эбиэт кэннэ куорат тэрилтэлэригэр сылдьыы, ол кэннэ түмүгү таһаарыы буолуохтааҕа. Биһиги онно сылдьыбатыбыт, биир күнүнэн муҥурданныбыт, секция үлэтин кэннэ тута дойдубутун быспыппыт. Эдэр суруйааччылар сүбэ-мунньахтара – айар куттаах эдэр дьону түмэр, салгыы үлэлииргэ туһаайар бэртээхэй тэрээһин. Манныкка сылдьан, эдэр киһи бэйэтин кыаҕын, дьоҕурун сөпкө сыаналана үөрэнэр; атыттары истэн, биллиилээх суруйааччылар сүбэлэрин ылынан, бэйэтин сайыннарарыгар тирэхтэнэ түһэр. Онон хас биирдии нэһилиэккэ, үөрэх кыһатыгар баар литературнай куруһуоктар чилиэннэрэ, салайааччылар, улуус култууратын салалтата маннык тэрээһиннэри көтүппэккэ, болҕомтоҕо ыларгыт наада.

Комментарии

Отправить комментарий

By submitting this form, you accept the Mollom privacy policy.
RSS-материал