Үйэ аҥаара - бииргэ (Винокуровтар дьиэ-кэргэн юбилейдара)

Быйылгы сыл биһиги ытыктабыллаах бэтэрээннэрбитигэр – Евгения Николаевна уонна Дмитрий Иванович Винокуровтарга – ураты, кэрэ-бэлиэ күннэрдээх. Ол курдук,  атырдьах ыйын 15 күнүгэр Дмитрий Иванович 85 сааһын туолла, балаҕан ыйыгар кинилэр ыал буолан олорбуттара 50 сыла буолла. Юбиляр Дмитрий Иванович – сэрии кэннинээҕи кэмнэр үрдүк үөрэхтээхтэриттэн биирдэстэрэ, бэйэтин көлүөнэтин бастыҥ бэрэстэбиитэлэ, үлэҕэ-үөрэххэ ыччаты, дьону көҕүлээччи, тэрийээччи, иитээччи быһыытынан төрөөбүт улууһугар биир тарбахха баттанар киһибит.

Кини 1931 сыллаахха Нам уонна Хамаҕатта икки ардыларыгар баар сайылыкка күн сирин көрбүтэ. Оччолорго ити сир Бастакы Хомустаах территориятыгар киирэр эбит. Аҕата Винокуров Иван Васильевич бастакы колхозтар тэриллиилэригэр «Соттуус» диэн табаарыстыбаны тэрийсибит, онтуката кэлин бөдөҥсүтүү түмүгэр Киров аатынан колхоз буолбута. Онно Иван Васильевич солбуйааччы бэрэссэдээтэлинэн үлэлээбит. Ийэтэ Вера Спиридоновна Куһаҕан Ыал нэһилиэгин Москвитиннар кыыстара эбит. 

Дмитрий Иванович оҕо сааһа Аҕа дойду Улуу сэриитин кэмигэр ааспыта: Дима уол сэрии ыар кэмнэрин аас-туор олоҕун улахан дьону кытта тэҥҥэ сүксэн, үлэлээн-хамнаан улааппыта.  Дьокуускайдааҕы пединститутка үөрэнэн, 1954 с. историк идэтин ылбыта,  сэбиэскэй-партийнай үлэҕэ анаммыта. Ол курдук 1954-56 сс Дьокуускайга комсомол обкомун инструкторынан, 1956-59 сс комсомол Намнааҕы кэмитиэтин бастакы сэкирэтээринэн, 1959-1963 сс Хатырык орто оскуолатыгар завуһунан, учууталынан, 1963-67 сс Өлөөн орто оскуолатын дириэктэринэн, 1967-68 сс Намнааҕы педучилище дириэктэринэн, 1968-81 сс партия Намнааҕы кэмитиэтин 2 сэкирэтээринэн үрдүк таһымнаахтык үлэллэбитэ. Ол кэнниттэн Дьокуускайга киирэн, партия обкомун инструкторынан бочуоттаах сынньалаҥҥа тахсыар диэри үлэлээбитэ.

Дмитрий Иванович Нам педучилищетыгар дириэктэринэн үлэлиир кэмигэр үөрэтэр документация сааһыланыытыгар сүрүн болҕомтотун уурбута: Ленинград куорат художественнай-педагогическай училищетыгар баран, уопут атастаһан, элбэҕи билбитэ-көрбүтэ, үөрэх былааннарын, литератураны аҕалбыта. Олорго олоҕуран, үөрэтэр программалар чочуллан, чопчуланан суруллубуттара, үөрэх процеһа лаппа саҥардыллан, үөрэтии хаачыстыбата үрдээбитэ. Бу кэмҥэ Дмитрий Иванович салалтатынан үлэлээн ааспыттара:  Шапошникова Валентина Павловна, Данилов Трофим Егорович, Крылов Константин Константинович, Местникова Ада Федоровна, Азарова Валентина Прокопьевна, Гаврильева Раиса Нигаметуловна уо.д.а. Кэлин кинилэр өрөспүүбүлүкэҕэ биллэр-көстөр  учууталлар, иитээччилэр буолбуттара. Дмитрий Иванович үтүөтэ-өҥөтө бу дьон үлэлэригэр көстөр. Ону таһынан кини, училище материальнай базата бөҕөргүүрүгэр үлэлэһэн, саҥа үөрэтэр средстволар атыылаһыллыбыттара. Дмитрий Иванович, Нам педучилищета атаҕар турарыгар 1 сыл иһигэр күттүөннээхтик үлэлээн, бэйэтин салайар дьоҕурун көрдөрөн, партия оройуоннааҕы кэмитиэтигэр иккис сэкирэтээринэн ыҥырыллар. Бу үлэтигэр кини уонтан тахса сыл эҥкилэ суох, үтүө суобастаахтык үлэлиир, оройуон үлэтин-хамнаһын салайсар. Онтон 1981 с. партия обкомун инструктора буола үүнэр.

Винокуров Д.И.-ы Нам улууһугар үтүө салайааччы, истиҥ табаарыс, үрдүк култууралаах киһи быһыытынан эрэ буолбакка, тапталлаах кэргэн, кыһамньылаах аҕа быһыытынан үрдүктүк сыаналыыллар.  Кини Евгения Николаевналыын 50 сыл иллээхтик-эйэлээхтик олорон, 2 кыыс оҕолонон, 4 сиэн эйэҕэс эбээтэ-эһээтэ буолан олороллор. Улахан кыыстара Айталина Дмитриевна библиотекарынан үлэлиир, кэргэнэ Ньурбаттан төрүттээх Ардахов Асап Васильевич таксистыыр. Кыра кыыс Күннэ Дмитриевна экономист уонна юрист үөрэхтээх, «Прометей» тэрилтэ генеральнай дириэктэрин солбуйааччытынан үлэлиир. Кэргэнэ Низамутдинов Ренат Хоттабыч диэн башкир омук бэрэстэбиитэлэ, «Саха Энерго» тэрилтэ былаанныыр отделыгар үлэлиир.

Намнааҕы педколледж коллективын аатыттан  ытыктабыллаах Дмитрий Ивановичпытын 85 сааһын туолбутунан уонна кэргэнинээн, сахалартан бастакы дьахтар-скульптор Евгения Николаевналыын, ыал буолан олорбуттара 50 сыллаах өрөгөйдөөх үбүлүөйдэринэн, итиэннэ кэлэн иһэр Учуутал күнүнэн итиитик-истиҥник эҕэрдэлиибит. Баҕарабыт кытаанах доруобуйаны, нус-хас олоҕу; оҕолоргут-сиэннэргит тапталларыгар угуттанан, ситиһиилэриттэн кынаттанан, өр сылларга үөрэ-көтө олороргутугар баҕа санаабыт бастыҥын, эҕэрдэ тылбыт эйэҕэһин аныыбыт.

Прасковья Байанаева, Тамара Румянцева, Намнааҕы педколледж

Комментарии

Отправить комментарий

By submitting this form, you accept the Mollom privacy policy.
RSS-материал