М.К.Аммосовка аналлаах устуоруйа уруогун ыыттыбыт

Ааспыт нэдиэлэҕэ, алтынньы 17 күнүгэр И.Е.Винокуров аатынан Намнааҕы педколледжка уһулуччулаах судаарыстыбаннай уонна общественнай деятель, бүтүн Сибииргэ комсомолу көҕүлээччи уонна тэрийсээччи, Саха сиригэр буолбут Олунньутааҕы революция кыттыылааҕа, сэбиэскэй былааһы олохтооччу уонна бөҕөргөтөөччү, Саха сирин автономиятын туруорсааччылар тумус киһилэрэ, номоххо киирбит биир дойдулаахпыт М.К.Аммосов туһунан устуоруйа уруогун быйыл иккис төгүлүн ыыттыбыт.

Тэрээһиҥҥэ олохторун оҕону иитиигэ-үөрэтиигэ анаабыт ытыктабыллаах 4 бэтэрээни ыҥыран, кинилэр тылларын-өстөрүн, олоххо мунньуммут баай уопуттарын иһиттибит. Ол курдук, I Хомустаах орто оскуолатыгар 1984 сылтан М.Аммосов аатынан пионерскай этэрээттэри тэрийбит, кэлин, Сойуус ыһыллыбытын да кэннэ, төлөннөөх патриот аатын сүгэр 2 кылааһы тэрийэн үлэлэппит, РСФСР үөрэҕириитин туйгуна, РФ уопсай уопсай үөрэхтээһинин Бочуоттаах үлэһитэ, Нам улууһун Ытык киһитэ, биһиги үөрэхпит кыһатын 1967 сыллаахха бүтэрбит М.Г.Степанова; I Хомустаах уонна Нам улууһун Ытык киһитэ, биһиги училищебыт 1 сыллаах педагогическай кууруһун 1964 сыллаахха бүтэрэн, математиканы үөрэтэр сертификаты ылбыт, кэлин онтун үрдэтинэн, математика учууталынан, сельсовет секретарынан үрдүк таһаарыылаахтык үлэлээбит үлэ бэтэрээнэ, «Эҥсиэли» уонна «Кыым» хаһыаттар биир көхтөөх кэрэспэдьиэннэрэ Е.И.Неустроева; бу дьыл балаҕан ыйыгар Москваҕа «Бэс чагда» доруобуйаны бөҕөргөтөр киинигэр бара сылдьан, М.К.Аммосов көмүллүбүт кылабыыһатыгар бара сылдьыбыт, Лена Максимовналыын хаартыскаҕа түһүспүт ытык кырдьаҕастар, үйэ аҥаарыттан ордук кэм анараа өттүгэр ыал буолан, 2 кыыс оҕолонор дьолу билбит педагогическай үлэ бэтэрээннэрэ Акулина Ильнична (Адыаччы нэһилиэгин уонна Дьааҥы улууһун Ытык киһитэ, математика учууталынан үлэлээбит) уонна Семен Семенович (физкультура учууталынан үлэлээбит, I Хомустаах Ытык киһитэ) Колесовтар кыттыыны ыллылар. Ыалдьыттарбыт хас биирдии бэйэлэрэ М.К.Аммосов туһунан санааларын эттилэр, бэйэлэрин үлэлэрин туһунан кылгастык, бэрт сэргэхтик кэпсээтилэр. Семен Семенович ону таһынан хомуска оонньоото уонна сахалыы ырыа ыллаан иһитиннэрэн, тэрээһин ис хоһоонун байытта.

Тэрээһин түмүгэр үтүө холобурунан оҕону иитиигэ үлэлэһэр М.Г.Степанова М.К.Аммосов дэгиттэр талааннаах, бары өттүнэн сайдыылаах эбитин санатан туран, бу тэрээһиҥҥэ сылдьыбыт оҕолортон спорка, үөрэххэ ситиһиилэрин таһынан кэмпириэнсийэлэргэ дакылаатынан кыттыбыт устудьуоҥҥа анал премияны олохтуур санаалаахтарын иһитиннэрдэ, оҕолор ааттарын испииһэктээн ылла. Түмүгү эһиил баччаҕа таһаарыахпыт диэн буолла, колледжтан мин уонна Эверстов Ю.А. кыттыһабыт. Онон М.К.Аммосов сырдык мөссүөнэ ыччаты үүнүүгэ-сайдыыга көҕүлүүр биир сонун сүүрээн буолар чинчилэннэ. Түмүгэр күндү ыалдьыттарбытыгар махтанан, устудьуоннар оҥоһуктарын бэлэх ууннубут уонна хаартыскаҕа түстүбүт.

П.Д. Байанаева, колледж устуоруйатын үөрэтэр түмэл үлэһитэ

Комментарии

Отправить комментарий

By submitting this form, you accept the Mollom privacy policy.
RSS-материал