Сайдыыга туһулуур көрсүһүү

Бэнидиэнньиккэ, сэтинньи 14 күнүгэр, И.Е.Винокуров аатынан Намнааҕы педагогическай колледжка Бастакы Бэрисидьиэммит М.Е.Николаев кэлэн, устудьуоннары, үлэһиттэри кытта көрсөн, сэһэргэһэн барда. Үйэлэр кирбиилэринээҕи дьалхааннаах, олус уустук, Арассыыйа саҥа олоҕу тута сатыыр бутуурдаах кэмигэр Сахабыт Өрөспүүбүлүкэтин салайааччыта буолан, ырааҕынан эҥсэр тобуллаҕас толкуйунан, муударай уонна хорсун быһаарыыларынан олох бары хайысхаларыгар сүҥкэн хардыылары, уларытыылары киллэрбит хаһан да сотуллубат-сууйуллубат, кыайан сыаналаммат сүдү үтүөлээх-өҥөлөөх күндү ыалдьыппытын ис сүрэхпититтэн долгуйан, сүргэбит көтөҕүллэн көрүстүбүт. Үөрэх кэмэ буолан, Михаил Ефимовичтыын кэпсэтиигэ үөрэх туйгуннара, активистар, үлэһиттэр сырыттылар. Хаһан да буоларын курдук, 80 сааһыгар үктэммит ытык киһибит хас биирдии тыл этээччини олус болҕомтолоохтук иһиттэ, ыйытыылары биэрдэ уонна холкутук,  бэйэтин кэскиллээх санааларын ылыннарардыы, киһини толкуйдатар, үүнүүгэ-сайдыыга көҕүлүүр бэрт сонун иһитиннэриилэри оҥордо, сүбэлэри биэрдэ.

Бүтүн Арассыыйаҕа ураты суоллаах-иистээх, мындыр салайааччы быһыытынан билиниллэр саарыммыт кэллэктииби үлэҕэ-хамнаска күннээҕинэн, инники 2-3 сылынан муҥурдаммакка, 20-30 сылынан сайдыы ханнык таһымҥа тахсыахтааҕынан сирдэтинэргэ ыҥырда. Адьас аҕыйах сылынан олоххо-дьаһахха роботтар кэлимник туттуллар буолуохтарын, ол инниттэн бүгүҥҥүттэн аныгы сайдыылаах технологиялары баһылыырга, тобуллаҕас толкуйу, өйү сайыннарарга, үөрэҕи-билиини төрдүттэн тупсарарга, классик-суруйааччыбыт улуу Ойуунускай «Сүүс сыллаах былаанын» сиһилии үөрэтэрбитигэр, виртуальнай сибээс көмөтүнэн тыа уонна куорат диэн араастаһыы симэлийэн эрэрин, устуоруйа хаамыытыгар 10-20 сыл чыпчылҕаҥҥа тэҥнэһэрин бэлиэтээн эттэ. Киһи киһиттэн үөрэнэрин, сайдарын быһыытынан, бэйэбит эрэ өйдүүрбүтүнэн олорбокко, ситиһиллибит кирбиилэринэн дуоһуйан, олорон хаалбакка, киһи-аймах бастыҥ уопуттарын үөрэтэн, өйү-санааны атастаһан, омук дойдуларын уонна Арассыыйа атын эригийиэннэрин кытта сибээстэри олохтоон, кэлиини-барыыны хааччыйан, олортон үөрэнэн, бэйэ-бэйэни байытыһан, сайдыы саҥа үктэллэригэр тахсарбытыгар сыал-сорук туруорда.

Көрсүһүүгэ мустубут дьон Михаил Ефимович ыйыыларын, хас биирдиибитигэр туһуламмыт сүбэлэрин бэркэ сэргээн иһиттибит уонна Махтал суругу кытта устудьуоннар оҥорбут үлэлэрин өйдүү-саныы сылдьарыгар бэлэхтээтибит.

Прасковья Байанаева, Тамара Румянцева, колледж уһуйааччылара

Комментарии

Отправить комментарий

By submitting this form, you accept the Mollom privacy policy.
RSS-материал