Умнуллубат үтүө аат

Биһиги үөрэхпит кыһатыгар араас кэмҥэ олус талааннаах, дириҥ билиилээх, үлэлэригэр бэриниилээх, үөрэтэр-такайар оҕолоругар бэйэлэринэн холобур буолар үтүөкэннээх учууталлар үлэлээн ааспыттара. Олор истэригэр, туох да саарбаҕа суох, бу ый 16 күнүгэр төрөөбүтэ 85 сылын туолбут Николай Ильич Бережнов киирсэр.

Орто Халымаҕа күн сирин көрбүт Бережнов Н.И. туһунан дьон-сэргэ өйдөбүлэ биир: кинини тыыннааҕар көрбүт, кэпсэппит, чугастан билбит дьон бука бары: «олус кырасыабай», «олус интеллигентнэй», «олус маанытык таҥнара», «таҥас олус үчүгэйдик олорор киһитэ этэ» диэн этэллэр; «Слово об учителе» диэн 5 сыл анараа өттүгэр, Николай Ильич төрөөбүтэ 80 сылын туолбут бэлиэ күнүгэр анаммыт хомуурунньукка эмиэ итинник ахтыллар.

Дьон өйүгэр-санаатыгар бу курдук чаҕылхай мөссүөнү хаалларбыт, 30 сыл педагогика уонна психология курдук учууталлары бэлэмниир кыһаҕа сүрүн предметтэри үөрэппит, үгүс сыл оҕолору үөрэххэ ылар хамыыһыйа эппиэттиир сэкирэтээринэн үлэлээбит биир идэлээхпитигэр анаан Ахтыы уруогун ыыттыбыт. Кыттыыны ыллылар: РФ үтүөлээх учуутала, педагогическай билим кандидата, учууталлар учууталлара, НПУ-га 27 сыл завуһунан, дириэктэринэн үрдүк таһаарыылаахтык үлэлээбит, Уус Алдан, Нам улуустарын бочуоттаах олохтооҕо, колледж Ытык киһитэ Иванов Василий Петрович; РФ орто анал үөрэхтээһинин бочуоттаах үлэһитэ, СӨ үөрэҕириитин эйгэтин бочуоттаах бэтэрээнэ, СӨ бочуоттаах пенсионера, колледж уопсайыгар 18 сыл сэбиэдиссэйинэн эҥкилэ суох үлэлээбит Алексеева Луиза Семеновна; Нам улууһун бочуоттаах олохтооҕо, үрдүк үөрэхтээх тутааччы, үөрэнэр куорпуспутун тутуспут, ол кэннэ колледжка  куттал суох буолуутугар эппиэттиир инженеринэн 12 сыл үлэлээбит, Бережнов Николай Ильич хаан-уруу быраата Оконешников Спиридон Васильевич уонна  Николай Ильичкэ үөрэммитин бэйэтин дьолунан ааҕар, бэйэтин ийэлэрин Када Федоровнаны уонна Аита Федоровнаны солбуйан, колледжка бэрт сэргэхтик уонна айымньылаахтык үлэлии-хамныы сылдьар, ыччат кутун туппут биир бастыҥ уһуйааччыбыт, СӨ үөрэҕириитин туйгуна Местникова Селена Михайловна.

Ахтыы уруогун колледж дириэктэрэ, экономическай билим кандидата Мурукучаева Надежда Павловна аста. Кини бу тэрээһин бэтэрээннэр көҕүлээһиннэринэн ыытылларын тоһоҕолоон бэлиэтээтэ, маннык бииргэ үлэлээһини олус биһириирин биллэрдэ уонна уруок сыалын-соругун иһитиннэрдэ. Ол кэнниттэн ыҥырыылаах ыалдьыттарбыт биир-биир туран, Николай Ильич туһунан бэрт истиҥ ахтыылары оҥордулар, олор быыстарыгар учуутал туһунан хоһооннор ааҕыллан, тэрээһин ис хоһооно байытылынна. Ахтыылар Бережнов Н.И.-һи учуутал, көннөрү киһи, патриот, общественник быһыытынан толору арыйдылар.  Алексеева Л.С.  Николай Ильич Леонид Попов «Күндэли» айымньытынан «Дьол» диэн пьеса сценарийын суруйан, М.П.Иванова учууталлары уонна устудьуоннары кытыннаран, бэртээхэй испэктээкили туруоран, 4 сылы быһа элбэх сирдэринэн гастроллаабыт үтүө кэмнэрин ахтан-санаан ылла.

Уруок биир саамай үөрүүлээх уонна долгутуулаах түгэнинэн Спиридон Васильевич убайын Бережнов Н.И. наҕараадаларын 20 сыл устата хараҕын харатын курдук харыстаан илдьэ сылдьыбытын колледж түмэлигэр туттарыыта буолла. Бу колледж сайдыытын үөрэтэр музейга бэрт улахан суолталаах, сыаналаах бэлэх буолар.

Тэрээһин учуутал туһунан ырыанан түмүктэннэ, устудьуоннар махталларын бэлиэтин күндү ыалдьыттарбытыгар өйдөбүнньүк бэлэхтэри туттардылар. Бу курдук  «үтүө киһи үтүөтэ үс үйэ умнуллубат» диэн норуот муударай этиитэ бигэргэннэ: Бережнов Н.И. суох буолбута 20 сыл буолбут да буоллар, кини дьоһуннаах олоҕо дьон өйүгэр-санаатыгар кытаанахтык иҥэн, уос номоҕо буолан, учуутал үрдүк аналын ыччат дьоҥҥо итэҕэтиилээхтик тиэртэ.

 

Комментарии

Отправить комментарий

By submitting this form, you accept the Mollom privacy policy.
RSS-материал