Аҕа көлүөнэ билиитин үллэстэр

Алтынньы 13 күнүгэр И.Е.Винокуров аатынан Намнааҕы педколледж «Ыллык» литературнай куруһуогун дьарыгар «Отуу уота» айар түмсүү чилиэннэрэ: Дунаев А.Г., Бубякин И.А.-Чөҥөчөх, Мохначевская М.П.-Маарта-Мария – кэлэн ыалдьыттаатылар.

Түмсүү салайааччыта, НПУ 1976 с. выпускнига, сүүрбэччэ кинигэ ааптара, мелодист Александр Дунаев хоһоон суруйуу теориятын олус тиийимтиэтик, Иван Арбита айымньытынан холобурдаан быһаарда. Иван Бубякин-Чөҥөчөх – биһиги өрүү үөрэ көрсөр олохтоох суруйааччыбыт. Кини бу сырыыга бэйэтин айымньыларыттан ааҕан иһитиннэрдэ, ыйытыыларга хоруйдаата, эдэр дьон илиини араарбакка суруйалларыгар, хоһоону элбэхтик чочуйалларыгар сүбэлээтэ. Үһүс ыалдьыппыт Маарта-Мария – сааһын тухары бытовойга иистэнньэҥинэн үлэлээбит уус тарбахтаах Далбар Хотун. Кини бу сыл тохсунньу ыйыттан эрэ саҥа хоһоон хонуутугар үктэммитин соһуйа иһиттибит. Маарта-Мария элбэх ахсааннаах хоһооннорун дьон сөбүлээн ааҕар, онтулара бассаап нөҥүө бөлөхтөн бөлөххө түргэнник тарҕаналлар. Кини тута хоһуйар ураты дьоҕурдаах, ону бэрт судургутук: «Былыр үөрэҕэ суох төрүттэрбит олоҥхо курдук улахан айымньыны, араас тойуктары, оһуохайы суруга-таймата суох толоро сырыттахтара, оччотугар кинилэр тута хоһуйар дьоҕурдара биһиэхэ да бэриллиэхтээх буоллаҕа», - диэн быһаарар.  Маарта-Мария уруккуттан эҕэрдэ суруктары хото суруйар эбит, онтуларын дьон хайгыыллара үһү, «наһаа истиҥнэр» дииллэр эбит. Уонна: «Хоһоонно суруйан көр, табыллыа!» - диэн сүбэлээбиттэрин ылынан, хоһоон суруйан барбыт. Тылга дьоҕурдаах буолан, хоһоонноро төтөлө суох киирэллэр эбит. Маны этэн эрдэхтэрэ – «талааннаах киһи барытыгар талааннаах!». Маарта-Мария айар үлэтин олус сэҥээрэрим иһин, кини саҥа таһаартарбыт кинигэтин бэлэхтээбитин олус долгуйа, астына туттум.

Ыалдьыттарбыт кэннилэриттэн устудьуоннар бэйэлэрин холонууларын ааҕан иһитиннэрдилэр. А.Г.Дунаев олортон Павел Герасимов хоһооннорун сэҥээрэн, киниэхэ бэйэтин кинигэтин бэлэхтээтэ уонна колледж библиотекатыгар анаан 2 кинигэни  биэрдэ. Маарта-Мария Алена Мохначеская хоһооннорун сэҥээрбитин биллэрдэ уонна бэйэтин кинигэтин бэлэх уунна.

Бу курдук литератураны сэҥээрэр устудьуоннар билиилэригэр билии эбинэн, сэргэх дьарыктан астынан бардылар.

 

Прасковья Байанаева, Мария Гоголева, куруһуок салайааччылара

Комментарии

Отправить комментарий

By submitting this form, you accept the Mollom privacy policy.
RSS-материал